“O‘zbekinvest” eksport-import sug‘urta kompaniyasi AJ Farg‘ona filialida “Korrupsiyaga qarshi kurashish – Vatan taraqqiyotining kafolati” mavzusida tadbir tashkil etildi. Unda filialning shahar va tuman rahbarlari va hamkor tashkilotlar ishtirok etdi.

Korrupsiyaga qarshi kurashish mamlakatimizda olib borilayotgan siyosiy-huquqiy islohotlarning asosiy yo‘nalishlaridan biri bo‘lib kelmoqda. Davlat organlari va jamoat tashkilotlari mazkur yo‘nalishda xodimlarining huquqiy savodxonligini oshirishga alohida e’tibor qaratayotgani quvonarli hol. Sug‘urta kompaniyasida ham bu borada tizimli ishlar olib borilib, xodimlar o‘rtasida mavzu doirasida muntazam seminar-treninglar o‘tkazib kelinmoqda.

– Korrupsiya holatlarining oldini olish va ularni bartaraf etishning eng muhim jihatlaridan biri – boshqaruv tizimida “inson omili”ni kamaytirish uchun axborot-kommunikatsiya texnologiyalarini keng joriy etishni yo‘lga qo‘yishdir. Sug‘urta polislarini sotish, sug‘urta da’volarini ko‘rib chiqish va boshqa masalalarda tartib-taomillarni soddalashtirish, elektron polis qamrovini kengaytirish ahamiyatlidir, – deydi kompaniyaning xavfsizlik bo‘yicha bosh menejeri Aziz Abdullayev.

Tadbir davomida viloyat adliya boshqarmasi bosh maslahatchisi Aligavhar Qosimov korrupsiyaga qarshi kurashish sohasidagi davlat siyosatining ustuvor yo‘nalishlari, Korrupsiyaga qarshi kurashish agentligining vazifalari va mavjud qonunchilikdagi korrupsiya bilan bog‘liq holatlar haqida ma’lumot berdi.

“O‘zbekinvest” sug‘urta kompaniyasi 
Farg‘ona filiali Axborot xizmati