2021 йилнинг ёз ойларида Қўқон шаҳар 12-меҳрибонлик уйида тарбиячи бўлиб ишлаб келган Нилуфархон Рўзматова ўзи тарбиялаган болаларга меҳри тушиб қолгани сабаб, бир йўла 8 нафарини оиласига фарзандликка олади.

Бугун улар оила бағрида эмин-эркин камол топмоқда. Онага айланган тарбиячи фарзандларига ҳақиқий меҳрни бериб келмоқда.

Ҳар бир оила учрагани каби бу хонадон эгалари ҳам турмушнинг яраша ширин ташвишлари билан юзланди. Оила бекаси 5 нафар ў‌ғлига ҳатна тўйи қилиш арафасида Фарғона вилояти Миллий гвардия бошқармасига мурожаат қилди.

– Бошқарма бошлиғи полковник Шавкат Aкбаровга мурожаат қилган кунимоқ, Қўқон шаҳар ҳокимлиги бола ҳуқуқларини ҳимоя қилиш мутахассислари дарҳол менга боғланиб, тўй харажатларига ёрдам қилишини айтди. Сал ўтмай, Миллий гвардия Қўқон шаҳар ходимлари совға-салом ва велосипедлар билан кириб келишди. Ҳар қандай кунда ҳам давлат бизга мададкорлигидан хурсандман. Полковникка икки фарзандимнинг соғлиги масаласида қилган мурожаатим ҳам назоратга олинди. Бу иккисини бугун ордер асосида марказий шифохоналарда даволатиб келдим. Оилавий болалар уйига эътибор бу даражада кучли бўлади деб кутмагандим, – дейди 7 ўғил ва 1 қизнинг онаси Н.Рўзматова.

Бошқарма бошлиғи Шавкат Aкбаровга кўра, Меҳрибонлик уйидан оила бағрига кетган болаларни барча соҳаарлда имтиёзлари сақланиб қолади, Давлат уларни ўз ҳолига ташлаб қўймайди.

– Ҳали булар мактабни тамомласа, оила бағрида ўсган бўлса ҳам, Президент қарорига кўра уларга ўз уйларини берамиз. Болаларнинг барча ижтимоий муносабатлардаги имтиёзи сақланиб қолган. Шавкат Мирзиёевнинг тегишли қарори билан ҳуқуқий асослантирилган. Миллий гвардия бу масалада фарзанд асраб олган оилаларга беғараз ёрдамини бериб келади, – дейди полковник Шавкат Aкбаров.

Шермуҳаммад Деҳқонов