Bugun, 28 sentabr kuni Fargʻona xalqaro aeroportida Urganch-Fargʻona-Urganch aviaqatnovining ilk yoʻlovchilari kutib olindi. Hamda Fargʻonadan Urganchga ilk parvoz amalga oshirildi.

Oʻzbekistonda ichki va ziyorat turizmini rivojlantirish va soha rivojiga toʻsiq boʻlayotgan muammolarni bartaraf etish yuzasidan Oʻzbekiston Respublikasi Transport vaziri Ilhom Mahkamov boshchiligidagi ishchi guruh vodiy viloyatlariga tashrif buyurib, soha mutaxassislari bilan uchrashuvlar tashkil etgan edi.

Mazkur uchrashuv  davomida tur operatorlik kompaniyalari vakillari tomonidan Fargʻonadan Urganchga toʻgʻridan toʻgʻri qatnovlarni yoʻlga qoʻyish masalasi koʻtarilgandi. Tadbirkorlar tomonidan mazkur qatnov narxlari, harakatlanish grafiklari haqida berilgan takliflari inobatga olingan holda Urganch-Fargʻona-Urganch qatnovi narhi bir tomon uchun 314 702 soʻmdan, ikki tomon uchun esa 596 849 soʻmdan boshlanib, haftaning har chorshanba va shanba kunlari amalga oshirilishi belgilandi.

Fargʻona viloyatida faoliyat olib boruvchi tur operatorlar tomonidan hamda koʻp sonli aholining talab va istaklarini inobatga olgan holda bugun Urganch-Fargʻona-Urganch aviaqatnovining ilk parvozi amalga oshirildi.

Ushbu qatnovda harakatlanuvchi yoʻlovchilar mazkur qatnovlar tashkil etilganidan bagʻoyat mamnun ekanliklari qilinayotgan islohotlar inson manfaati uchunligidan yana bir dalil boʻla oladi.

Maʼlumot oʻrnida aytadigan boʻlsak, mazkur qatnov grafigiga koʻra Urganchdan 09:20 da uchgan samolyot Fargʻonaga qoʻnish vaqti 11:10, Fargʻonadan 12:00 da uchgan samalyot 13:40 da Urganch aeroportiga qoʻnishi belgilangan.

Qariyb 1200 km masofa qisqa vaqt oraligʻida bosib oʻtilishi eng avvalo turizm ihlosmandlari hamda ishbilarmon doira vakillari uchun qator qulayliklarni yaratishi bilan ahamiyatli sanaladi.

Shundan kelib chiqqan holda bu yoʻnalishlarda kelgusida talabga qarab qoʻshimcha qatnovlarni yoʻlga qoʻyish belgilangan.

Fargʻona viloyat Transport boshqarmasi axborot xizmati